[香港。食食食] 星期六午餐@越一越南牛肉粉專門店

星期六唔使返工，最開心就係瞓到自然醒，瞓醒就出門食個late lunch。
今日想食越南粉，所以就上網搵下近近哋荃灣食。
兩點左右過咗食飯時間又未到下午茶時間，都要等咗一陳先有位。

主要吸引我幫襯嘅原因係原個西瓜/菠蘿冰(跟餐+$28)，原個菠蘿咁上的確幾吸引，而飲落亦覺得係用新鮮打嘅沙冰，味道偏淡但上面有兩圈菠蘿好甜好食。

另外我哋兩個人仲叫咗一個午餐 - 香茅豬扒湯粉($42)+酸辣鳳爪(跟餐+$22)。

個粉好滑又好食，我媽覺得湯底味甜但我就覺得唔錯，仲有芽菜、蔥、香葉碎、洋蔥。

而豬扒大細都合理同埋偏廋，普通香茅豬扒一塊。

個鳳爪都夠味，有蕃茄、生菜、芹菜、芫茜，但啲伴菜食落唔夠汁啲芹菜仲好大棵，芫茜我接受到但芹菜真係唔得。下次唔會再食。

整體嚟講都係唔錯都會再幫襯，下次要試埋個西瓜冰。

食完正餐仲行過啲去食埋豆腐花做甜品。

豆腐花+薏米、豆腐花+綠豆

天氣咁熱當然凍食，豆腐花有豆香而糖水唔甜，我自己覺得薏米太淡所以鍾意綠豆多啲。

越一越南牛肉粉專門店

消費: $92 (2人)

可用app取票等位 - THEGULU

贊和豆品

消費: $10 (2人)